Deputetja e Partisë së Lirisë, zonja Erisa Xhixho, përmes një postimi në rrjetet sociale, ka njoftuar kërkesën drejtuar Gjykatës Kushtetuese, për shfuqizimin e nenit 24, pika 2 dhe nenit 69, pika 1, gërma “dh”, fjalia e dytë, të Ligjit nr.29/2023 “Për tatimin mbi të ardhurat”, i ndryshuar, si i papajtueshëm me Kushtetutën e Republikës së Shqipërisë.
Sipas saj, qeveria u ka ngarkuar një barrë të re mijëra profesionistëve në të gjithë vendin dhe i ka shpallur luftë shtresës së mesme.
Postimi i Erisa Xhixho:
Kemi depozituar në Gjykatën Kushtetuese “Ligji për Profesionistët e lirë “
Prej 1 janarit, qeveria u ka ngarkuar një barrë të re mijëra profesionistëve në të gjithë vendin. Ligji për taksimin e profesioneve të lira, me të cilin kjo qeveri i shpall luftë shtresës së mesme, do të rëndojë mbi mijëra biznese të vogla dhe individë të vetëpunësuar.
Taksa 23% për profesionistët e lirë është taksë mbi dijen.
Ligji i ri do rëndojë biznesin të ndershëm dhe shtresën e mesme.
Taksimi me 23% do t’i detyrojë shumë prej tyre të rrisin çmimet e shërbimeve, duke e zhvendosur barrën te konsumatori final, pra qytetari i thjeshtë.
Rreth 3 miliardë lekë shtesë synon të arkëtojë qeveria përmes kësaj takse, për të mbushur gropat e krijuara nga skemat korruptive.
Ne kemi detyrimin të mbrojmë qytetarët përballë çdo tentative për zhvatje që maskohet si ligj.
Ndaj presim që Gjykata Kushtetuese të shfuqizojë këtë ligji, duke vënë të parin interesin e qytetarit shqiptar!
