Një vajzë 4-vjeçare ka ndërruar jetë mëngjesin e sotëm pas një zjarri të shkaktuar në banesën ku gjendej ajo.
Shpërthimi, i cili u dëgjua rreth orës 6 të mëngjesit, dyshohet se u shkaktua nga një ngrohëse elektrike, raporton KTV.
4-vjeçarja me inicialet I.S., shtetase e Shqipërisë, e cila dyshohet se ishte vetëm brenda ndërtesës kur ndodhi zjarri, sipas dëshmitarëve, u nxor nga banesa nga nëna e saj.
Njëri nga banorët e ndërtesës, i cili nuk ka pranuar të flas para kamerës, ka thënë se pasi ka dëgjuar shpërthimin dhe britmat e nënës, ka zbritur në korridorin e ndërtesës dhe në mesin e tymit ka parë vajzën e shtrirë në tokë. Ai menjëherë i është ofruar për të dhënë ndihmën e parë dhe këtë e ka bërë deri në momentin kur në vendin e ngjarjes kanë ardhur emergjenca dhe policia.
Të tjerë banorë, prapa kamerës, thonë se fëmija kur u nxor nga ndërtesa ishte në gjendje të rëndë shëndetësore.
Përkundër përpjekjeve të ekipit kujdestar të klinikës emergjente, për shkak të gjendjes së rënduar shëndetësore, fëmija nuk ka arritur të mbijetojë.
Zyra për Informim e QKUK-së ka konfirmuar se 4-vjeçarja ka ndërruar jetë pas orës 7 të mëngjesit të sotëm.
Ndërsa Policia e Kosovës ka konfirmuar se nga informacionet e para dyshohet se fëmija ka ndërruar jetë si pasojë e ngufatjes nga tymi i zjarrit të shkaktuar. Më tutje thuhet se policia po vazhdon punën për hetimin e shkaqeve që kanë sjellë deri te ky incident.
Ndërkohë, nëna e vajzës është shoqëruar për në polici.
