Tirana shkarkoi Julian Ahmatajn nga posti i trajnerit. i dyti që shkarkohet këtë sezon pas Orges Shehit.
Dhe menjëherë kanë filluar të dalin emrat e parë për pasuesin e tij në stolin e rekordmenëve të futbollit shqiptar.
Në emisionin “Elite Show” u zbulua se Erjon Xhafa, i pranishëm në panel, së bashku me Erbim Fagun është një nga kandidatët për stolin bardheblu.
Xhafa foli në lidhje me këtë situatë, duke zbuluar edhe telefonatën e marrë nga një drejtues i klubit të Tiranës.
“Është nder që emri im lidhet me Tiranën. Kam bërë bisedime me miq që kam lënë aty, pasi kam kaluar një vit e gjysmë shumë të mirë.
Dikush nga klubi Tirana më ka telefonuar dhe më ka kërkuar takim, vetëm kaq”, u shpreh ish-mbrojtësi i njohur.
41-vjeçari ishte pjesë e klubit kryeqytetas si zv. trajner në sezonin 2019/2020, që u kurorëzua me fitimin e titullit kampion.
