Policia e Vaut të Dejës raporton se ka zbardhur dy raste ë tentativës së shkatërrimit të pronës me zjarr, të ndodhura ditët e fundit, duke arrestuar autorin. Autoritetet raportojnë se në pranga është vënë shtetasi Gjergj Dajani, 41 vjeç, banues në fshatin Stajkë.
Sipas policisë, ky shtetas dyshohet se më datë 15 shkurt ka hedhur një shishe me lëndë djegëse në drejtim të fasadës së supermarketit me administrator shtetasin L. M., 41 vjeç, banues në Shkodër, pa shkaktuar dëme
Gjithashtu, dy ditë më vonë, më datën 17 shkurt, ka hedhur një shishe me lëndë djegëse, në drejtim të automjetit tip “Benz”, në pronësi të shtetasit B. S., 49 vjeç, banues në fshatin Shelqet.
Policia njofton se vijon puna hetimore për zbardhjen e rasteve të tjera të shkatërrimit të pronës, që mund të jenë kryer nga ky shtetas.
Materialet procedurale i kaluan Prokurorisë së Shkodrës për veprime të mëtejshme.
