Armando Dobra është duke fituar titullin kampion në National League me Chesterfieldin. Futbollisti që debutoi në një moshë fare të hershme me Ispwich, kishte disa lëkundje të vogla në karrierë, derisa u bashkua me Chesterfield.
Atje shpërtheu dhe është lojtari që dashurohet më shumë nga tifozët për shkak të mënyrës së lojës me driblimet dhe golat spektakolar.
Në këtë sezon Dobra ka realizuar 9 gola dhe është drejt ngjitjes në League Two. Por ëndrra e tij më e madhe pasi ka luajtur me Shqipërinë U-21, është Kombëtarja A.
Në një intervistë për emisionin Koha Shtesë, Dobra tregoi edhe objektivin që i ka vendosur vetes.
“E kam ëndërr që të luaj me Kombëtaren A. Mund të luaj me Shqipërinë, e di që Silvinjo organizon futboll të mirë dhe unë i përshtatem atij stili. Duhet të rritem akoma më shumë dhe kam besim se brenda 1 viti do të jem pjesë e Shqipërisë. Por deri tani nuk kam pasur kontakte nga Silvinjo. Unë i besoj vetes dhe e di që një ditë do të luaj edhe në Premier League. Ftesa në Europian do të ishte ëndërr. Ndoshta jo tani, se ka lojtarë që luajnë në nivel të lart, por pas 1-2 vitesh do të jem pjesë e Kombëtares.
Golat e Asanit? Ato gola mund të bëhen një herë në tre vite, nuk i sheh shpesh. Golat e Asanit nuk i kam parë ndonjëherë në Kombëtares, uroj që ta përsërisi edhe në Europian. Unë i kam parë të gjitha ndeshjet e Shqipërisë në shoqërinë e babait. Babai është i çmendur pas Kombëtares, kemi ndjekur edhe ndeshjet e Europianit kur isha 15 vjeç.
Silvinjo mund të më kërkojë pasi unë jam një futbollist që i gënjej lojtarët në driblim dhe krijojë hapësira për shokët e ekipit. Uroj që të luaj një ditë me Armando Brojën aty, është padyshim modeli im pasi po luan në Premier League. Por te Kombëtarja ka shumë lojtarë të tjerë të mirë.
Nëse unë do të grumbullohem për në Europian, kam besim dhe parandjenjë se do t’i shënoja gol Italisë. E di që është thuajse e pamundur, ndoshta jo 0%, por më duhet të rritem ende për të mbërritur te Kombëtarja”, tha Dobra.
