Një 48-vjeçar grek, identiteti i të cilit nuk bëhet ende i ditur, është arrestuar në Athinë pasi u zbulua nga policia se falsifikonte etiketat e vajit të ullirit të cilin e shiste më pas në Shqipëri dhe Bullgari.
Sipas policisë greke 48-vjeçari importonte sasi të mëdha vaji luledielli ose kikiriku nga vende si Moldavia dhe Bullgaria. Më pas ai e përpunonte atë me lëndë kimike dhe e ambalazhonte në sasi të vogla me etiketa me mbishkrimin “vaj ulliri ekstra i virgjër”.
Në cilësinë e provës materiale u sekuestruan 14 ton vaj bimor, 6 ton vaj i përpunuar dhe i falsifikuar me etiketat e vajit të ullirit, të gatshme, dy automjete, si dhe aromatizues të ndryshëm dhe lëndë kimike që 48-vjeçari përdorte për të transformuar vajin.
Policia greke po vijon hetimet për të zbuluar skemën e tregtimit të vajit brenda dhe jashtë vendit.
48-vjeçari u dërgua në qeli dhe mbi të rëndojnë akuzat e falsifikimit të etiketës, falsifikim produkti dhe vënie në rrezik e jetës së konsumatorit me lëndë dhe materiale toksike dhe të rrezikshme.
