Klevi Qefalija u zyrtarizua si lojtari më i ri i Dinamos pak orë më parë. Mesfushori lë Tiranën me të cilët është pjesë që prej vitit 2018 dhe transferohet te rivalët e kryeqytetit.
Klubi bardheblu ka bërë gjithashtu njoftimin e saj dhe konfirmon se kanë arritur marrëveshje me dinamovitët për transferimin e 20-vjeçarit. Blutë do të paguajnë taksën e rritjes së lojtarit, që është detyrim nga rregullat e FIFA-s.
Tirana e falenderon për kontributin e dhënë dhe i uron suksese në aventurën e re.
“Faleminderit Klevi Qefalija! KF Tirana njofton se ka arritur marrëveshjen me klubin e Dinamos për transferimin e mesfushorit Klevi Qefalija. Mesfushori 20-vjeçar ka qenë pjesë e akademisë së Tiranës që nga viti 2018, teksa në vitin 2022, ai u shpall kampion me ekipin e parë. Klubi i Tiranës falënderon Qefalinë për kontributin e dhënë me fanellën bardh’ e blu dhe i uron suksese në aventurën e re”, shkruan klubi.
Klevi Qefalija është një produkt i akademisë së Dinamos, teksa në shtator të 2018 ai u largua në drejtim të Tiranës U-17 ndërsa debutimin me skuadrën e parë të bardhebluve e bëri në vitin 2021.
