Komisioni i Disiplinës dhe Etikës ka marrë vendimet e fundit sa i takon të gjitha ngjarjeve sportive në fundjavën që lamë pas, në të gjitha kategoritë e futbollit shqiptar.
Ekipi i Vllaznisë në futboll për femra është përjashtuar nga ky edicion i Kupës së Shqipërisë ashtu si edhe atë pasardhës duke i dhënë fund hegjemonisë disavjeçare të ekipit shkodran. Shkak është bërë mosparaqitja e skuadrës shkodrane në takimin e dytë ndaj Gramshit, edhe pse kishte fituar 2-0 ndeshjen e parë.
Shkak për mosparaqitjen e Vllaznisë në ndeshje është bërë një defekt i automjetit me të cilin po udhëtonin drejt stadiumit “Nexhip Trungu” të Cërrikut.
Ndërkohë në Superiore, Disiplina pezulloi me 3 ndeshje lojtarin e Tiranës, Albi Doka, për shkak të sjelljeve jo të përshtatshme ndaj zyrtarëve të ndeshjes.
Erzeni, Vllaznia dhe Kukësi janë gjobitur, për shkak të sjelljes së gabuar të tifozëve.
Vendimet:
KF Vllaznia, për sjellje të gabuar të spektatorëve, duke hedhur sende në fushën e lojës në ndeshjen kundër FK Kukësi, në bazë të nenit 17/2/b të KDE, dënohet me gjobë në masën 100.000 (njëqind mijë) lekë.
FK Kukësi, për sjellje të gabuar të spektatorëve, duke hedhur sende në fushën e lojës, në bazë të nenit 17/2/b të KDE, dënohet me gjobë në masën 50.000 (pesëdhjetë mijë) lekë.
Lojtari i KF Tirana, Albi Doka, për sjellje josportive ndaj zyrtarëve të ndeshjes, në bazë të nenit 14/1/j të KDE, dënohet me 3 (tre) javë pezullim nga veprimtaritë.
AF Elbasani, për sjellje të gabuar të spektatorëve, duke hedhur sende në fushën e lojës dhe fyer tifozerinë kundërshtare, në bazë të neneve 17/2/b dhe 17/2/h të KDE, dënohet me gjobë në masën 100.000 (njëqind mijë) lekë. Në zbatim të nenit 76/1/a të KDE, gjoba të aplikohet në masën 50%.
Lojtari i KF Teuta U-17, Samuel Xhafkollari, për sjellje josportive ndaj zyrtarëve të ndeshjes, në bazë të nenit 14/1/j të KDE, dënohet me 4 (katër) ndeshje pezullim nga veprimtaritë. Në aplikim të nenit 34/1 dhe 34/3 të KDE, vendoset pezullimi i pjesshëm i zbatimit të dënimit pas shlyerjes së gjysmës së tij. Periudha e pezullimit me kusht do të jetë 6 (gjashtë) muaj.
KF Vllaznia Femra, për braktisjen e ndeshjes së vlefshme të Kupës së Shqipërisë, kundër KF Gramshi Femra, në bazë të neneve 16/1 të KDE dhe 32/2 të rregullores së aktivitetit, dënohet me gjobë në masën 100.000 (njëqind mijë) lekë, humbet ndeshjen në tavolinë me rezultatin 3-0 dhe përjashtohet nga gara për sezonin aktual si dhe atë pasardhës. Sipas nenit 76/1/d të KDE, gjoba të aplikohet në masën 5%.
Rrëzimin e kërkesës së lojtarit të AF Luftëtari, Sousa Santos Jersival, si të pabazuar në Kodin e Disiplinës dhe Etikës. Kundër vendimit lejohet ankim brenda 3 (tre) ditëve përpara Komisionit të Apelit.
