Egnatia vazhdon të jetë tepër aktive dhe në merkaton e dimrit, me rrogozhinasit që së fundmi kanë prezantuar sulmuesin nga Lituania, Jouzas Lubas.
21-vjeçari ka firmosur për 2 vite e gjysmë me skuadrën rrogozhinase, teksa u prezantua në ambientet e “Arena Egnatia” nga presidenti Agim Demrozi.
“Unë jam shumë i kënaqur për këtë aventurë. Falënderoj presidentin për pritjen e ngrohtë. Shpresoj që të ndihmoj skuadrën të arrijmë objektivat”, ishin fjalët e para të Lubas si lojtar i Egnatias.
Gjatë kësaj merkato, klubi i drejtuar nga trajneri, Edlir Tetova, ka larguar nga organika Gytis Paulauska dhe Emiljano Mustën, ndërsa ka firmosur me mesfushorin turk Melih Ibrahimoglu, talentin shqiptar të rritur në akademinë e Olimpiakos, Rezart Rama dhe së fundmi Jouzas Lubas.
