Trajneri i Liverpool, Jurgen Klopp, beson se suksesi i Pep Guardiolës në stol është kryesisht për shkak të faktit se ai gjithmonë ka skuadrat më të mira. Pra, ai pohon se i vetmi ndryshim midis tyre si dy trajnerë, që do të përballen në çerekfinale të Ligës së Kampionëve, është cilësia e lojtarëve që menaxhojnë në skuadrat e tyre.
Në një intervistë për “UEFA.com”, me rastin e ndeshjes së Liverpool-Manchester City, të mërkurën, në ndeshjen e parë çerekfinaleve të Champions-it, trajneri gjerman shpjegon sukseset e Guardiolës:
“Ekipet e tij janë gjithmonë të pozicionuara në mënyrë të shkëlqyeshme. Vendosja është e rëndësishme, por nuk është magji. Ai gjithmonë ka pasur lojtarë të shkëlqyer, që kanë krijuar skuadra të shkëlqyeshme. Te Barcelonë ishin Xavi, Iniesta, Busquets, Lionel Messi dhe kompani. Te Bayern Munich, gjithashtu, kishte lojtarë fantastikë, që krijuan një skuadër shumë të mirë. E njëjta gjë te Manchester City. Silva, Agüero, Sané, Sterling dhe Jezus janë të jashtëzakonshëm”.
Duke krahasuar stilin e të dy teknikëve, Klopp, gjithashtu, nuk është se evidenton spanjollin:
“Në të vërtetë nuk ka dallime të mëdha, vetëm se Pep gjithmonë ka pasur skuadra më të mira në komandën e tij. Skuadrat e tij kanë qenë gjithmonë me lojtarë të klasit botëror, ndërsa ato të miat kanë pasur nevojë të përmirësohen paksa financiarisht”.
