Tirana e nisi vitin në mënyrën më të mirë teksa fitoi me një përmbysje spektakolare në derbin ndaj Dinamos.
Bardheblutë do të luajnë të rradhës sërish në Durrës ku do të përballen me Teutën e vendit të fundit këtë të premte në orën 17:00. Java pasardhëse do t’i rikthejë në shtëpi ku presin Skënderbeun.
Fitorja në këto 2 sfida është kusht i ‘panegociueshëm’ në kampin bardheblu dhe për të stimuluar akoma më shumë lojtarët ka menduar presidenti Refik Halili. Kreu i klubit ka akorduar një premio prej 12 mijë eurosh nëse dilet me 6 pikë në 2 sfidat e rradhës.
Tirana ndodhet në vendin e 3-të në renditje me 29 pikë, aq sa Vllaznia e vendit të 4-të dhe 6 më pak se Partizani i vendit të dytë ndërkohë që Egnatia kryesuese është 11 pikë larg.
Situata në ‘Final Four’ mund të quhet e ‘mbyllur’ tashmë teksa të 4 skuadrat kanë nisur shkëputjen me pjesën e poshtme.
