Në Rrugën e Kombit ka nisur rindërtimi i kabinave të kompanisë koncensionare, për mbledhjen e tarifës së vendosur nga qeveria. Por mendohet se rikonstruksioni i plotë dhe ringritja edhe një herë nga e para e sportelevë të vjeljes së taksës do të kërkojë dy muaj kohë. Gjithashtu shtyrja në kohë, është një formë për të zbutuar disi reagimin e madh qytetar.
“Nuk po paguhet se u shkatërrua ajo pjesë. Do ringrihet do kohën e saj. Mbase do të dojë një periudhë 60 ditore minimalisht”, tha ministri Damian Gjiknuri.
Pra, për rreth dy muaj përdoruesit e kësaj rruge mund të kalojnë pa paguar tarifën 5 euro. Më pas rinis aplikimi i pagesës. Kryeministri Rama tha se kjo tarifë as që diskutohet të negociohet, vetëm se do të aplikohen lehtësi për banorët e Kukësit dhe zonave të tjera përreth që janë edhe përdoruesit më të shpeshtë të zonës.
