Në ditën e 100-të të luftimeve në Rripin e Gazës, kryeministri izraelit Benjamin Netanjahu ka paralajmëruar se Izraeli nuk do ta përfundojë luftën deri në mbylljen e Korridorit të Filadelfit, një rrip toke prej 14 kilometrash që shërben si kufi mes Egjiptit dhe Gazës.
“Ne do të shkatërrojmë Hamasin dhe do të çmilitarizojmë Gazën. Pajisjet ushtarake dhe armët e tjera vdekjeprurëse do të vazhdojnë të hyjnë në këtë zonë, kështu që sigurisht që ne duhet ta mbyllim atë. Ka mënyra të ndryshme që Izraeli mund të marrë përsipër korridorin, por zyrtarët nuk kanë vendosur saktësisht se si do të vazhdojnë ta bëjnë këtë”, tha Netanjahu.
Sakaq, edhe Shtetet e Bashkuara të Amerikës dhe Britania e Madhe kanë vijuar sulmet ndaj rebeleve Houthi në Jemen, të cilët kanë një ushtri me rreth 20.000 luftëtarë dhe arsenal të madh raketash balistike dhe dronë, shumica të furnizuara nga Irani.
Sipas sekretarit të Jashtëm, David Cameron, Britania e Madhe nuk kishte zgjidhje tjetër veçse të ndërmerrte veprime ushtarake ndaj Houthis teksa paralajmëroi se çmimet do të rritesh në nëse rebelet do të bllokonin rrugët më të rëndësishme tregtare.
Përveç Gazës, tensione ka edhe në frontin me Libanin dhe Bregun Perëndimor. Deri më tani, rreth 23,710 palestinezë janë vrarë dhe mbi 60,000 janë plagosur, që pas sulmit të Hamasit më 7 tetor.
Nga ana tjetër nuk kanë munguar as protestat në mbështetje të Palestinës.
Në Uashington qindra protestues u mblodhën jashtë Shtëpisë së Bardhë për të dënuar sulmet dhe dhunën që është duke ushtruar ushtria izraelite ndaj popullit të Gazës.
Një protestë e ngjashme, por me numra shumë të mëdhenj pjesëmarrësish u mbajt dhe në rrugët e Londrës, e cila u shoqërua nën masa shumë të rrepta sigurie. Sipas organizatorëve, më shumë se 200 mijë persona u mblodhën në kryeqytetin britanik me apelin e vetëm “Palestina e Lirë”.
