Mjekët pediatër po përballen ditët e fundit me një fluks pacientësh të vegjël që janë prekur nga virozat e stinës.
Mjekja pediatre Sonila Brati duke folur në MCN TV tha se kur temperatura qëndron 39-40 dhe nuk bie, prindërit duhet t’i drejtohen mjekëve pediatër. Brati këshillon që të tregohet kujdes me antibiotikët pasi shpesh marrja e antibiotikut s’jep asnjë lloj efekti. Brati thotë se vaksina kundër gripit ka efekt, por nuk do të thotë se nuk preken do të nga gripi.
“Te fëmijët një gjë shumë shqetësuese është temperatura e lartë, që është rezistente, që shkon 39-40, një temperaturë që zgjat në ditë. Të tillë e kemi parë edhe vitin e kaluar. Vërejmë që ka fëmijë që vijnë te ne që kanë vetëm temperaturë, dhe s’kanë as kollë, as dhimbje fyti, asnjë gjë tjetër dhe temperatura vazhdon për disa ditë. Prindërit kanë të drejtë të shqetësohen kur temperatura është e lartë, sepse mund të çojë në komplikacione të tjera. Kur temperatura është 39-40 dhe nuk bie, absolutisht duhet t’i drejtohen mjekut. Duhet të drejtohen në qendrat shëndetësore, te mjekët pediatër, pastaj është mjeku që i jep të gjitha këshillat e nevojshme prindit. Për temperaturën duhet pasur kujdes, antipiretikët nuk duhet të ndahen këto ditë. Nëse e shikojnë që fëmija ka 24 orë që ka temperaturë të lartë që nuk zbret, duhet të drejtohen padiskutim te mjeku pediatër. Përveç temperaturës së lartë, problematika të tjera janë infeksione të rrugëve të poshtme respiratorë, shpesh herë kanë vështirësi në frymëmarrje, bebet e vogla, infeksione e rrugëve të sipërme respitratore. Gastrointeritet janë një problem tjetër që vazhdojnë te fëmijët, diarretë dhe të vjellat. Ndonjëherë gjendja me diarre dhe të vjellja mund të vazhdoj 4-5 ditë. Nuk mungojnë infeksionet urinare.
Te të rriturit këto ditë kemi hasur goxha viroza. Të gjithë kategoria e popullatës është e përfshirë. Kjo lloj viroze që edhe te të rriturit shoqërohet me temperaturë të lartë, dhe kalon në komplikacione respiratore, ka shumë ngjashmëri me covidin. Vazhdon të jetë i njëjti protokoll që ka qenë nga fillimi. Rastet me Covid janë të pakta, ato që dominojnë janë situatat virale. Që nga periudha e Covid-it vazhdojmë të kemi rapid teste nëpër qendra. Besoj që mund të gjenden edhe në farmaci. Nuk është e nevojshme që të shkohet deri në farmaci, pasi mund të vihet në qendër, të vihet te mjeku i familjes. Me antibiotikët duhet patur kujdes në këtë periudhë. Ndonjëherë marrja e antibiotikut nuk ka dhënë asnjë lloj efekti. Në rastin e kësaj viroze duhet bërë kujdes. Në rast komplikimi sigurisht që antibiotiku është shumë i domosdoshëm, por në rast të një virozë, kolle, temperature, është i panevojshëm. Ne kemi gjithë dimrin para. Vaksina e gripit ka filluar që në tetor të vitit të kaluar, dhe është shumë e domosdoshme për fëmijët, që kanë një sërë sëmundjesh kronike. Te fëmijët vaksina bëhet dhe ka një interes nga prindërit. Nëse u referohemi të rriturve, vaksina duhet bërë te moshat e treta, ata që kanë sëmundje kronike, qoftë kardiake, diabet, apo sëmundje respiratore. Efektivitet ka. Ti mund të vaksinohesh, por kjo s’do të thotë që s’mund të prekesh nga gripi. Por probaliteti për ta kaluar virozën më lehtë, apo në formë më të butë, është i rritur” – tha mjekja Sonila Brati.
