Ai ishte një nga të rinjtë e suksesshëm në fushën e biznesit në Tiranë, duke u futur në kategorinë e pinjollëve të pasur.
Sot është prapa hekurave. Jurgen Kurti, 23 vjeç deri dje në radhët e biznesmenëve të suksesshëm në Tiranë që menaxhonte një biznes të fuqishëm të pijeve alkoolike, ndodhet i arrestuar së bashku me dajën e tij, Leonard Ristani, 43 vjeç, pas vrasjes së të atit, Artur Kurti, 50 vjeç.
Në një rrëfim pak muaj më parë në emisionin “Adam” të gazetares Denisa Çerma në Channel One, 24 vjeçari thotë se fati ndonjëherë mund të rrokulliset. Intervista është dhënë në nëntor të vitit të shkuar, si një nga djemtë me jetë luksi e udhëtime të shumta në shumë vende të botës.
–A mendon se të ka përkëdhelur fati?
Pjesërisht po, por nëse nuk e ndihmon dhe ti fatin që të ka ndihmuar në një kohë më përpara do të të braktisë. Jeta ka surpriza të pakëndshme
-Sa orë punon në ditë?
Varet nga ditët. Ka ditë që drekën nuk e konsumoj para orës 18:00.
-E keni menduar veten pa para?
Patjetër që po! Njeriu duhet të jetë i përgatitur për çdo skenar që i sjell jeta. Por, siç është një shprehje popullore; çudia më e madhe tre ditë zgjat. Do të mësohesh.
-Pjesa më e madhe e të rinjve të moshës tënde punojnë shumë për të mbajtur familjet ose për të paguar studimet. E ke menduar ndonjëherë se si do të reagoje nëse jeta do të të përballte me ndonjë surprizë të pakëndshme?
Normalisht do të ishte e vështirë. Jeta ka surpriza të pakëndshme gjithë kohës, të mëdha ose të vogla. Jeta nuk është e shtruar në një fushë me lule.
Mund të kesh paratë, por mund të jesh i zhgënjyer nga pjesa e familjes, shoqërisë, etj. Jam munduar sa herë që jeta më ka goditur të ngrihem në këmbë edhe më fort.
-Je goditur?
Ka pasur raste kur jam goditur dhe nga pjesa ekonomike apo puna.
-Të bën paraja që të ndihesh superior?
Absolutisht jo! Më bën edukata, të jem i njerëzishëm.
-A të bën paraja të lumtur?
Deri diku po! Normalisht, gjërat që të bëjnë të lumtur, janë familja, shoqëria, shëndeti.
-Ku i bën pushimet?
Kam lëvizur në Gjermani, Vjenë. Për ditëlindjen e të dashurës isha në Paris. Në verë isha në Amerikë. Isha në Majemi dhe ishte diçka ndryshe nga Evropa./Channel One
