Prokuroria e Durrësit ka zbardhur detaje nga hetimet për vetëvrasjen e 41-vjeçares, Bedrie Loka në banesën e saj në fshatin Vardhardhë të Sukthit më 2 Janar.
Sipas Prokurorisë, nga deklarimet e familjarëve të të 41-vjeçares, nga kqyrja e telefonave celularë si dhe veprimeve të tjera hetimore ka dyshime se bashkëshorti i saj ushtronte dhunë fizike dhe psikike ndaj të ndjerës.
Hetuesit kanë ngritur dyshimet se keqtrajtimi sistematik ndaj të ndjerës, e ka çuar në vetëvrasje.
Ditën kur 41-vjeçarja ndërmorri aktin e vetëflijimit, në katin e parë të banesës ku ajo jetonte janë gjetur një shishe plastike me ujë dhe disa kapsula fotoksinë, të cilat dyshohet se i ka konsumuar Bedrie Loka.
Gjithashtu, më datë 06 janar është kqyrur banesa e familjes Loka, ku rezultoi se “në kotecin e pulave në anën jugore të banesës … gjendet e mbështjellë me peshqir një armë zjarri automatike “PPS”, me krehër, pa fishek, pjesët e lëvizshme të rregullta e me gjilpërë të rregullt, me numër arme “89-0579”, si dhe “në këtë vend janë gjetur 114 copë fishekë, model ’54, kalibër 7.62mm dhe 4 katër fishekë model ’56, kalibër 7.62mm”, të cilat, pasi u sekuestruan me cilësinë e provës materiale, u dërguan pranë Institutit të Policisë Shkencore Tiranë për t’ju nënshtruar ekzaminimit teknik balistik, raporton Prokuroria.
Ndaj Xhemal Lokës, janë ngritur akuzat për “shkaktimi i vetëvrasjes”, kryer në dëm të shtetases Bedrie Loka., dhe “mbajtja pa leje dhe prodhimi i armëve, armëve shpërthyese dhe i municionit”.
Lidhur me kallëzimin penal të të viktimë për adresën e hapur në TikTok, Prokuroria njofton se është regjistruar procedim penal për veprën penale të “Falsifikimit kompjuterik” dhe hetimet për këtë procedim vazhdojnë.
