Cristiano Ronaldo ka festuar Pashkët me të dashurën e tij, Georgina Rodriguez në ambientin e gjelbëruar në oborrin e shtëpisë së portugezit.
Ylli 33-vjeçar ka ndarë foton me partneren e tij në “Instagram”, përmes së cilës ka përfituar të urojë edhe besimtarët e tjerë katolikë që festojnë Pashkët.
Sulmuesi luzitan u la i lirë nga trajneri Zinedine Zidane për takimin që zhvilluan ditën e shtunë ndaj Las Palmas, të cilin e fituan 0-3.
Gareth Bale dhe Karim Benzema patën rastin dhe fatin që të ndihmojnë skuadrën për të siguruar tre pikë me vlerë në kuadër të javës së 30-të të La Ligas.
Me fitoren e arritur madrilenët shkuan në kuotën e 63 pikëve në vendin e tretë, katër më pak se Atletico që pozicionohet i dyte, ndërsa Barça kryeson renditjen me 76 pikë.
Zidane la pushim edhe dy lojtarët e tjerë, kapitenin Sergio Ramos dhe mesfushorin Isco Alarcon, të cilët sipas tij kishin një shqetësim të vogël.
Lojtarët do të jenë gati për supersfidën e nesërme që do të luajnë ndaj Juventus në “Allianz Stasium” në kuadër të fazës çerekfinale të Ligës së Kampionëve.
