Fakulteti i Arteve të Bukura në Universitetin Charles të Pragës, ku një student vrau 14 persona këtë muaj, njoftoi sot se do të qëndrojë i mbyllur të paktën deri në fund të janarit.
Zyrtarët e shkollës bënë me dije se nuk do të kërkojnë që nxënësit të japin provimin në fund të semestrit të vjeshtës, i cili përfundon më 12 janar, gjë që do t’i lejojë ata të shtyjnë dorëzimin e detyrave të tyre.
Një student 24-vjeçar hapi zjarr brenda shkollës më 21 dhjetor, duke vrarë 14 persona, përpara se të vriste veten. 24 persona të tjerë u plagosën nga sulmi.
“Të gjitha vlerësimet (të nxënësve) do të kryhen në baza vullnetare dhe formati i tyre mund të modifikohet në varësi të rrethanave ,” sipas një njoftimi për shtyp të postuar në faqen e internetit të shkollës.
“Ju sigurojmë se edhe nëse nuk merrni nota për semestrin e vjeshtës, do të mund të vazhdoni me besim studimet dhe të përfundoni me sukses programin tuaj në të ardhmen ”, thuhet në tekst.
Pak para Krishtlindjeve, sulmi tronditi vendin me 10.8 milionë banorë, anëtar i Bashkimit Evropian dhe NATO-s, ku incidente të këtij lloji janë jashtëzakonisht të rralla.
Sipas policisë, sulmuesi vrau gjithashtu dy persona që kishte zgjedhur rastësisht në periferi të Pragës më 15 dhjetor, një baba dhe vajzën e tij dy muajshe.
Në ditën e sulmit, vrasësi vrau fillimisht të atin, në shtëpinë ku jetonin së bashku. Ende nuk janë zbardhur motivet e autorit.
