Pak ditë më parë ndërroi jetë në moshë të re Ilda Gjoni, e ëma e aktores Anna Lika dhe motra e Inis dhe Ingrit Gjon, pas një beteje me një sëmundje të pashërueshme.
Së fundmi, ka ardhur një reagim dhe nga Ingrit Gjoni, e cila ka prekur me fjalët dedikuar motrës së ndjerë. Këngëtarja, në një postim në rrjetet sociale, shkruan se nuk e kishte menduar kurrë që do të shkruante për ikjen e motrës së saj.
Ingrit Gjoni shkruan se ajo ishte më e mira mes motrave, teksa i bën premtimin se do të kujdeset përjetë për tre fëmjët e saj, Anën, Vikin dhe Rodeosin.
“Besoj shumë që Zoti do ta shpërblejë me Parajsë për çdo gëzim që solli mes nesh në Tokë. Engjët dhe qielli janë shtëpia e saj sot dhe unë lutem për paqen e saj.” – shkruan ndër të tjera Ingrit Gjoni.
Ilda Gjoni ndërroi jetë më 26 Dhjetor në Itali dhe trupi i saj do të sillet në Shqipëri, ku do të përcillet për në varrezat e Sharrës më 29 dhjetor
Postimi i plotë:
Ky është publikimi më i vështirë që kam bërë në jetën time… Nuk e kisha menduar kurrë që do të shkruaja për ikjen e motrës sime, më të mirës prej nesh.
Ilda Gjoni, nuk ishte veç motra jonë e mrekullueshme, ajo ishte vajza shembullore, nëna më e përkushtuar e Anës, Vikit dhe Rodeos, bashkëshortja e lumtur e Mikenit, shoqja që kushdo do të donte, mikesha që e kishte zemrën hapur për të gjithë. Ishte buza e qeshur, për të njohur dhe të panjohur.
Ajo ishte tezja më fantastike, që u bë mami e dytë e Paridit. Unë nuk do mundem kurrë të shkruaj as 1% të asaj që meritonte Ilda. Besoj shumë që Zoti do ta shpërblejë me Parajsë për çdo gëzim që solli mes nesh në Tokë. Engjët dhe qielli janë shtëpia e saj sot dhe unë lutem për paqen e saj. Ilda, motra të do shumë gjithmonë dhe të premtoj që do kujdesem përjetë për dritat e syve të tu.
Faleminderit të gjithëve ju për dashurinë dhe kujdesin e treguar ndaj nesh. Zoti ua shpërbleftë me të mira!
Përcjellja e fundit dhe homazhet do të bëhen më 29 dhjetor nga shtëpia funerale “Parajsa”, ora 14:00, në Sharrë.
