Ndeshja mes Fenerbahces dhe Galatasaray-t në kampionatin turk janë gjithmonë të ndezura dhe nuk është rastësi që ky cilësohet si një nga derbit më të zjarrtë në botë.
Fakti që dy ekipet luftojnë për titullin kampion, e ka bërë sfidën e kësaj fundjave edhe më të ndezur se zakonisht dhe pjesë e përplasjeve në fushë janë bërë edhe Edin Dzeko dhe Mauro Icardi.
Të dy lojtarët u konfrontuan në një moment mes tyre duke mos kursyer sharjet dhe ato momente tensioni i kanë vazhduar edhe në rrjetet sociale.
Në një moment të sfidës, Icardi u përplas me kokë në shtyllë dhe pas ndeshjes, postoi një foto të tijën me syrin e nxirë. Klubi i Galatasaray-t përfitoi nga momenti për t’u ankuar për arbitrat pikërisht me foton e Icardit me syrin e nxirë.
“Ata që duan drejtësi vetëm për veten, këtë natë vazhduan të manipulojnë futbollin turk nga çdo kanal i mundshëm. Po shpërndajmë atë që komiteti i arbitrave, salla e VAR-it dhe 26 telekamera nuk mund të shohin dhe ndjejmë turp për ta! Shpresojmë që një ditë kush ka sjellë futbollin turk në këtë pikë t’i vijë turp…”, shkruante Galatasaray në rrjete sociale.
