65-vjeçari Hashim Syla nga Mitrovica e Kosovës, dyshohet se teksa ka qenë duke peshkuar në bregun e lumit Buna, ka rrëshqitur aksidentalisht dhe ka rënë në lumë.
Ngjarja ka ndodhur më 17 Dhjetor, por teksa ka kaluar rreth një javë, ende nuk ka asnjë shenjë për gjetjen e trupit të tij. Ditën e ngjarjes polumbarët e “RENEA-s” filluan kërkimet për gjetjen e trupit të 65-vjeçarit, por pa rezultat.
Ditën e djeshme, në vendin tonë mbërriti dhe një kontingjent i specializuar i Forcave të Sigurisë së Kosovës për të gjetur trupin e kosovarit. Përmes një postimi në rrjetet sociale, FSK shpërndau sot pamjet ku bënte me dije kërkimet me polumbarë për gjetjen e trupit të Hashim Sylës.
“Po vazhdon operacioni i Kërkim Shpetimit në lumin Buna në Republikën e Shqipërisë, në bashkëpunim me Forcat e Armatosura të Shqipërisë, me qëllim kërkimin dhe gjetejen e qytetarit nga Kosova i cili ka rënë aksidentalisht në lumin Buna.” – shkruan FSK në postimin e saj.
