Vrasja e Arben Lleshit nga Sokol Mjacaj brenda burgut të Peqinit, duket se ka rritur kontrollet për sendet që futen në qeli në të gjitha burgjet e fundit.
Së fundmi, është arrestuar një zyrtar i burgut të Drenovës në Korçë, pasi ka tentuar të futë alkool brenda burgut. Burime bëjnë me dije se në pranga është vënë shtetasi E.P. me detyrë specialist i burimeve njerëzore në burgun e Drenovës.
Mësohet se ky i fundit do të kalonte një çantë me ushqime, ndërsa brenda saj iu gjet një bidon me pije alkoolike (raki), e cila është e ndaluar të futet në ambientet e burgut.
Teksa ka nisur hetimi për rastin, SHKB e burgjeve ka urdhëruar arrestimin e specialistit, i cili u dërgua në paraburgimin e komisariatit të Korçës. Ai akuzohet për veprat penale “Futja dhe mbajtja e sendeve të ndaluara në IEVP“ dhe “Shpërdorim detyre“ parashikuar nga neni 324/a-2 dhe 248 K.Penal.
