Kryeministri Rama pas toneve të larta gjatë ditës së djeshme, ka dalë sot në një bashkëbisedim me gazetarët për të sqaruar pozicionin e tij në lidhje me vendosjen e tarifës në Rrugën e Kombit. Ai thotë se qytetarët e Kukësit janë keqinformuar.
‘’A e keni lexuar kontratën?! Me siguri që përgjigja është jo. Fakti që në kontratë është e parashikuar një ulje për kaluesit e shpeshtë të rrugës, është interpretuar si një tërheqje nga ana ime. Nuk ka asgjë që të tërhiqesh, po ky nuk është rasti në fjalë.
Më vjen keq se në këtë proces, kjo kontratë është e parashikuar që para dy vitesh, ngrihet një furtunë në gotë, dhe derdhet dhe nxjerr zjarr mbi pronën e përbashkët, dhe duhet që ta dëmshpërbeljë sërish buxheti ynë i përbashkët. Aktet vandale mbi pronën, do të paguhen nga ana e shtetit”, u shpreh Rama.
Kryeministri Edi Rama tha më tej se kjo kompani vetëm nga momenti i nënshkrimit të kontratës ka bërë 15 milionë euro investime në mirëmbajtjen e rrugës.
