Aventura e sulmuesit spanjoll Alvaro Morata te skuadra e Chelsea mund të mbyllet shumë shpejt, madje sulmuesi mund të rikthehet te skuadra e Real Madrid verën e ardhshme. Morata verën e kaluar u bë lojtari më i shtrenjtë i blerë ndonjëherë nga klubi londinez (60 milionë stërlina) dhe pas një starti të mirë, rendimenti i tij ka rënë shumë, duke përfunduar në stol nga trajneri Conte. Ndaj dhe zërat për një largim të tij janë shtuar.
E përditshmja britnike “Express” bën me dije se Morata mund të rikthehet te skuadra e Real Madrid, e cila synon t’i japë një shans të tretë për të treguar veten. I ardhur te Chelsea për të zëvendësuar Diego Costa, sulmuesi spanjoll ka zhgënjyer për shkak të probleme fizike dhe formës jo të mirë. Por pas disa ditëve pushim në Dubai, lojtari mund të jetë gati për këtë fundsezon, ndërkohë që deri më tani ka realizuar 13 gola për Chelsea në 39 ndeshje.
Real Madrid e ka vënë në listën e lojtarëve që mund të marrë verën e ardhshme, kun ë krye është sulmuesi i Bayern, Robert Lewandowski, por në rast se ky transferim dështon, atëherë Morata kthehet në objektivin kryesor. Morata është larguar dy herë nga Reali, një herë drejt Juventusit dhe një herë drejt Chelsea, ndaj në rast se rikthehet sërish në Madrid kjo do të ishte hera e tretë për të që do të luante në “Sandiago Bernabeu”.
