UEFA ka bërë të ditur kalendarin e ndeshjeve të fazës me eliminim direkt të Ligës së Kampioneve dhe klubet kanë filluar menjëherë të bëjnë llogaritë për lojtarët e mundshëm që do t’u mungojnë në sfidat e para.
Shkak bëhet Kupa e Azisë dhe Kupa e Afrikës, dy aktivitete që zhvillohen në muajt e parë të këtij viti e kësisoj mund t’i detyrojnë të humbasin emra të rëndësishëm.
Ndeshjet e para në Ligën e Kampioneve luhen më datat 13 dhe 14 shkurt, por pikërisht tre ditë para tyre, më datat 10 dhe 11 shkurt luhen finalet e Kupës së Azisë dhe Kupës së Afrikës. Dhe ka lojtarë që mund të mungojnë si pasojë e këtyre sfidave, pasi do të jenë pjesë e përfaqësuesve në aktivitetin e rëndësishëm.
Te Lacio është Kamada që rrezikon pasi japonezi me përfaqësuesen e tij është pretendent për të fituar trofeun. Ndërsa PSG e Bayern Munich mund të humbasin lojtarë të rëndësishm në përbërje. Francezëve mund t’u mungojë Hakimi (Marok) dhe Kang-in Li (Kore e Jugut).
Ndërsa bavarezëve mund t’u mungojnë emra si Kim (Kore e Jugut), Mazraoui (Marok) dhe Choupo-Moting (Kamerun). Haidara i Leipzig si dhe Traore e Kubo të Real Sociedad janë emra të tjerë që rrezikojnë të mungojnë në ndeshjet e para.
