Nga Boldnews.al
Një 57 vjeçar është arrestuar nga posta policore e Manzës në Durrës, pasi ka kanosur me sëpatë një shtetase. Konflikti është denoncuar disa ditë më parë nga redaksia e BoldNews.al, teksa në videot që ne transmetuam dukej shtetasi N.Sokoli me sëpatë në dorë. Ai i drejtohej ish-administratores së firmës “Albania Turist Resort” Ana Shtjefni, duke e kanosur me mjet të mprehtë.
Ngjarja ndodhi mesditen e datës 7 dhjetor brenda Kepit të Rodonit, në një konflikt që ka vijuar për muaj me radhë. Synimi i të gkitja palëve është të shtënë në dorë një prej pasurive më të mëdha në Shqipëri, pronat bregdetare të Kepit të Rodonit. Disa javë më parë 8 persona u arrestuan, ndërsa 1 tjetër u shpall në kërkim pasi kishte qëlluar me armë.
Ditën e premte, Policia e Durrësit njoftoi se ka vepruar pas konfliktit me sëpatë në Kepin e Rodonit. Në njoftim policia thotë se ka arrestuar një 57 vjeçar, i cili prej kohësh vepron në atë zonë në “emër” të Kishës Françeskane. “Specialistët për Hetimin e Krimeve të Stacionit të Policisë Manzë arrestuan në flagrancë shtetasin N. S., 57 vjeç, banues në Tiranë, pasi ka kanosur me mjetë prerës (sopatë) shtetasen A. Sh., për motive pronësie” thuhet në njoftimin e Drejtorisë së Policisë së Durrësit.
Mësohet se 57 vjeçari është “shefi” i rojeve të Kishës Françeskane, i cili po përplaset me këdo në atë zonë. Para disa javësh u konfliktua me banorët e zonës, me shtetasin Bajram Kaculi dhe kësaj herë me këtë shtetase. Nuk kanë munguar armët dhe mjetet mprehtëse, kësaj herë sëpata. Në njoftim, Policia e Durrësit thotë se materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
Në datë 7 dhjetor, BoldNews.al publikoi një artikull të shoqëruar me video për vijimin e konfliktit për pronat në zonën e Kepit të Rodonit, në Njësinë Administrative Ishëm në Durrës. Redaksia e Boldneës.al kishte siguruar disa pamje nga konflikti i ditës së enjte, më datë 7 dhjetor 2023 në zonën e Kepit të Rodonit.
LEXO EDHE: Plas sëpata! Rindizet konflikti për tokën te Kepi i Rodonit (VIDEO)
Denoncuesja Ana Shtjefni ka filmuar disa persona, mes të cilëve edhe rojtarin N.Sokoli me sëpatë në dorë. Sipas saj, ky person ka tentuar që të qëllojë me këtë mjet të mprehtë atë dhe shoqëruesit e saj. Ndërkohë, menjëherë është lajmëruar Policia e Ishmit, e cila ka shkuar në vendngjarje dhe po bën ekspertimet e nevojshme. Konflikti është në vijim e sipër se kush do ta kontrollojë Kepin e Rodonit. Në zonë janë parë persona me rrezikshmëri të lartë shoqërore nga të gjitha palët.
