Seria A këtë javë vjen e gjitha të shtunën, pasi në mesjavë do të luhet sërish. Në fushë nga minuta e parë pritet të jenë disa prej futbollistë të kombëtares që luajnë në elitën e futbollit italian.
Këtë herë ka edhe një derbi, teksa në sfidën Lazio-Benevento do të përballen nga minuta e parë portieri Thomas Strakosha dhe mbrojtësi Berat Gjimshiti. Në këtë takim mungon mesfushori vlonjat Ledian Memushaj, i cili nuk është i gatshëm për këtë takim dhe do të duhet ta ndjekë nga tribuna.
Arlind Ajeti duket se e ka humbur rolin e titullarit dhe në takimin që Crotone zhvillon në transfertë me Fiorentinën ai pritet ta nisë nga stoli, edhe pse është përfolur gjatë kësaj jave që mund të aktivizohet si mesfushor, pozicion që ai do ta bënte pa problem.
Aktivizimi si titullar në takimin Shqipëri-Norvegji nuk ka pasur asnjë ndikim për të ndryshuar situatën e mbrojtësit me klubin e tij në Itali.
Sikurse ndodh zakonisht, portieri Etrit Berisha do të jetë në mbrojtje të katërkëndëshit të Atalantës në sfidën kundër Udineses. “Gardiani” kuqezi pati probleme gjatë periudhës së grumbullimit me Shqipërinë dhe nuk luajti në miqësoren e 26 qershorit me Norvegjinë. Por kjo ndodhi edhe për shkak të vendimit të trajnerit Christian Panuçi për të aktivizuar Strakoshën, gjë që e kishte menduar prej kohësh.
Ai është i gatshëm për lojë do të bëjë më të mirën e tij në takimin e nesërm te Serie A.
Dilemat për Elseid Hysajn janë shuar.
Shkodrani u dëmtua me kuqezinjtë, por nuk ka pasur asgjë serioze për të. Me të mbërritur në Itali ai ka nisur përgatitjet me skuadrën dhe është programuar të luajë nga minuta e parë në sfidën që Napoli do të luajë nesër ndaj Sassuolos në transfertë.
