Mandatin e parë nuk ia doli dot, por duket se dhe këtë mandat kryeministri Edi Rama nuk ia doli sërish. Bëhet fjalë për premtimin në lidhje me bashkimin e Drejtorisë së Tatimeve atë të Doganave.
Pavarësisht deklaratave edhe këtë mandat, asnjëherë Ministria e Financave nuk nisi punën për të ndërtuar një draft për realizimin e këtij projekti.
Kështu mësohet se qeveria është tërhequr përfundimisht nga projekti i bashkimit të administratës tatimore dhe asaj doganore në një të vetme.
Burime nga Ministria e Financave por dhe nga Doganat kanë thënë se krijimi i një skeme të tillë do të ishte një “gabim trashanik”.
Vetë Ministria e Financave pranon se nisma për t’i bashkuar këto dy drejtori të rëndësishme krijon risk në mbledhjen e të ardhurave, si dhe shkrirja e tyre në një është gati e pamunduar për shkak të problematikave që këto dy drejtori mbartin edhe të ndara.
Më herët këtë skemë e provoi dhe Kosova dhe dështoi, ndërsa kryeministri Rama merrte si shembull Kanadanë dhe Suedinë.
