Deputeti i Partisë Socialiste Alket Hyseni, i denocuar nga një banore e Himarës se i ka grabitur 11 mijë metra katrorë tokë, ka dalë sot para parlamentit, duke pretenduar se pasuria është vënë në mënyrë të ndershme.
“Deklaroj me përgjegjësi të plotë se çdo akuzë është e pavërtetë. Asnjë qindarkë e pasurisë time nuk ka ardhur nga veprimtari të paligjshme”-tha fillimisht Hyseni. Me një deklaratë të “përpunuar” me detaje, më shumë se të jepte dokumentacione që vërtetojnë se nuk ka abuzim me pronën e marrë prej tij, ka folur politikisht dhe “justifikuar” pasurinë e vënë.
“Kam punuar pa ndërprerje me familjen, për të siguruar të ardhura të kënaqshme, por nuk ka qenë asnjë herë synim pasuria ime. Më është dashur të punoj dyfish të tjerëve për të arritur aty ku jam”-deklaroi Hyseni. Pak ditë më parë në mbledhjen e grupit parlamentar të PS-së, kryeministri Edi Rama i kërkoi që të dilte dhe reagonte publikisht për këtë çështje, pasi po i “prishej imazhi” edhe qeverisë.
