Ish-spiuni rus Sergei Skripal dhe vajza e tij Yulia, u helmuan nga një agjent nervor vdekjeprurës i lënë në derën e përparme të shtëpisë në Salisbury.
Specialistët e armëve kimike njoftuan se te dera e shtëpisë së Skripalit gjetën përqëndrimin më të lartë të substancës së përdorur në sulmin ndaj tij.
Autoritetet thanë se detektivët do të përqëndrohen tek shtëpia e Skripal dhe i kërkuan ndjesë publikut për shqetësimin e krijuar, por situata është e rëndë dhe kërkon vëmendje maksimale.
Korrespondenti i Sigurisë, Gordon Corera, tha se përqendrimi më i lartë u gjet në dorezën e derës së Skripal dhe shtoi se do të kjo shpjegonte se pse agjenti nervor mund të jetë gjetur në makinën e tyre, e cila është marrë nga policia, dhe tek restoranti në të cilin ata kishin ngrënë, i cili ishte i rrethuar nga detektivë.
Gjurmë të agjentit nervor janë gjetur edhe në disa vende të tjera në qytet, por ato ishin në përqëndrime më të ulëta.
Rreth 250 oficerë kundër terrorizmit vazhdojnë të punojnë në këtë rast, duke shqyrtuar 5.000 orë filmimesh dhe 1.350 artikuj që janë konfiskuar.
Babë e bijë u gjendën pa ndjenja në një park larg shtëpisë në Salisbury më 4 mars dhe janë në një gjendje kritike për jetën.
Britani akuzon Rusinë për helmimin e ish-spiunit, duke marrë mbështetjen edhe të vendeve perëndimore. Si kundërpërgjigje për Rusinë, këto vende njoftuan dëbimin e diplomatëve rus.
