Ish-oficeri i policisë në SHBA, Besnik Llakatura është dënuar me 14 vite burg nga Gjykata e Bruklin.
Ndaj 38 vjeçarit shqiptar, rëndon akuza e pjesëmarrjes në një organizatë kriminale që shantazhonte bizneset në Queens, New York.
Në vitin 2013, Llakatura ishte oficer aktiv në zonën e Staten Island. Njëkohësisht ai ishte anëtar edhe i një grupi kriminal, që drejtohej nga një tjetër shqiptar, Redinel Dervishaj, i cili njihej si një gangster i dhunshëm .
Ish-polici, ishte si “arma sekrete” e Dervishaj, shantazhonte biznesmenë, duke i detyruar të paguanin mijëra dollarë në muaj dhe madje duke i kërcënuar ata.
Në Dhjetor të vitit 2015, Llakatura pranoi fajësinë në Gjykatë dhe u shkarkua nga Departamenti i Policisë së Nju Jorkut. Ai tha para hetuesve se drejtuesi i grupit kriminal, Redinel Dervishaj ishte një person i rrezikshëm dhe kishte lidhje me krimin e organizuar shqiptar.
Sipas avokatëve, Llakatura e ka quajtur gabim të madh bashkimin me organizatën e Redinel Dervishaj, vëllai i të cilit Plaurent Dervishaj është një person në arratisje dhe i shpallur në kërkim ndërkombëtar nga Interpoli dhe autoritetet amerikane.
Prokurorët pohuan gjithashtu se Llakatura, i cili ishte i martuar, terrorizoi të dashurën e tij, duke abuzuar fizikisht me të dhe duke ndjekur lëvizjet e saj me një pajisje GPS që ai fshehurazi i vendosi në makinën e saj. Ajo nuk ka dëshmuar kundër, por ka pranuar dhunën e ushtruar nga Llakatura ndaj saj.
Llakatura ka fituar tre medalje për detyrën e tij, duke rrezikuar edhe jetën.
Por sipas qeverisë, ai kishte një jetë të dyfishtë, “duke shërbyer si një oficer i betuar për të mbështetur ligjet që ai ka shkelur në mënyrë flagrante”.
“Ai e ka shkelur betimin e tij, duke shpërdoruar simbolin e tij dhe reputacionin e zyrtarëve të zbatimit të ligjit në përgjithësi”, thanë prokurorët.
