Zyra Qëndrore e Regjistrimit të Pasurive të Paluajtshme ka evidentuar një sërë abuzimesh me titujt e pronësisë.
Kreu i zyrës qëndrore të regjistrimit të pasurive, Elion Semanaj, thotë se janë konstatuar shkelje dhe në vendimet e gjykatave.
Semanaj tha se:
“Mund të përmendim së pari rastin kur me një vendim gjykate të nivelit më të ulët është rritur sipërfaqja e pasurisë me plot 20 hektarë, kur pasuria dhe sipërfaqja janë përcaktuar dhe regjistruar më përpara me një vendim të Gjykatës së Apelit. Ky veprim është kryer në bashkëpunim me zyrën vendore, e cila nuk ka ankimuar vendimin dhe nuk ka paraqitur provat e nevojshme pranë Gjykatës Administrative të shkallës së parë. Gjithashtu kjo ka sjellë si pasojë rritjen e sipërfaqes në favor të spekulantit duke dëmtuar rëndë interesat e shtetit.”
Gjatë verifikimeve janë vërejtur abuzime edhe me rastet e marrjes së pronës në përdorim në bazë të ligjeve për ndarjen e tokave.
“Gjithashtu njësia administrative vendore ka plotësuar dhe ka konfirmuar aktin e marrjes së tokës në pronësi për një person i cili ka qenë minoren në momentin e përfitimit të tokës bujqësore në bazë të ligjit 7501.Gjithë dokumntacioni është përcjellë si i rregullt nga njësia vendore drejt zyrës vendore të regjistrimnit të pasurive të paluajtshme, gjë e cila bie në kundërshtim me të gjitha aktet ligjore dhe aktet nënligjore në fuqi”,- shtoi gjithashtu Semanaj.
Gjetjet do ti referohen më pas task-forcës së ngritur nga Kryeministria dhe në përfundim të hetimit të thelluar administrativ do ti përcillen dhe organeve ligjzbatuese.
