Janë miratuar nga UEFA ndryshimet e propozuara në rregulloret e aktiviteteve të saj për sezonin që vjen, sa i përket orarit të ndeshjeve por edhe zbutjes së kufizimeve për regjistrimin e futbollistëve të afruar në mes të sezonit.
Kështu, nëse ndeshjet e Ligës së Kampioneve më përpara fillonin në orën 20:45, UEFA ka vendosur që për çështje marketingu, ato të nisin në orën 21:00.
Ndërkaq, 4 ndeshje të fazës së grupeve në çdo javë, dy të martën dhe dy të mërkurën, do të fillojnë në orën 18:55, ndërsa takimet do të luhen të gjitha në të njëjtën orë në ndeshjet e gjashta në grup.
Për finalen e Ligës së Kampioneve, Ligës së Europës dhe Supërkupës së Europës, klubeve do t’u lejohet të kenë 12 lojtarë në stol.
Ndërkohë në të gjithë ndeshjet me eliminim direkt, trajnerët do të kenë mundësi të bëjnë zëvendësimin e katërt gjatë kohëve shtesë.
Klubeve u është dhënë mundësia të regjistrojnë lirshmërisht lojtarët në Ligën e Kampioneve, pasi tani do të mund të shtojnë në skuadrën e tyre pas fazës në grupe tre lojtarë të rinj, pa asnjë kufizim.
