Real Madrid do të presë Rayo Vallecanon në “Santiago Bernabeu” për të zhvilluar mes tyre sfidën e javës së 12-të të La Liga. Një duel ku madrilenët do të tentojnë fitoren për të mos u shkëputur nga vendi i parë në klasifikim.
Për të folur për këtë përballje në konferencën për shtyp ishte i pranishëm Carlo Ancelotti, i cili foli për disa nga lojtarët kryesorë të ekipit. Sipas trajnerit italianin, Bellingham është përfekt dhe për momentin nuk ka asgjë për të përmirësuar, ndërsa ndër të tjera dha lajmin e madh, atë të rikthimit të Arda Guler.
“Bellingham? Bellingham për momentin nuk ka asnjë defekt, nuk ka asgjë për të përmirësuar. Tani ka nevojë vetëm për vazhdimësi. Ajo që bën diferencën te lojtarët është pikërisht vazhdimësia dhe për fat ai e ka pasur edhe këtë. Më befason sepse shpenzon shumë në aspektin fizik, nuk është natyrale për një lojtar të karakteristikave të tij.
Rodrygo dhe Vinicius? Jam i bindur se Rodrygo dhe Vini në vazhdimësinë e sezonit do të shënojnë më shumë gola se Bellingham. E rëndësishme është që kur të mos shënojë Rodrygo dhe Vinicius të jetë Bellingham dhe Joselu. Por, unë nuk e kam me nxitimi, golat do të vijnë edhe për Rodrygo e Vinicius.
Arda Guler? Arda Guler këtë javë nisi stërvitjet me grupin dhe do të jetë i grumbulluar për ndeshjen me Rayo Vallecanon. Pak nga pak do të nisë të marrë edhe minuta”, u shpreh Ancelotti.
