Kapja e 613 kilogramëve kokainë në kontenierin me banane në Durrës, përfundon si “krim ordiner”. Prokuroria e Krimeve të Rënda shpalli moskompetencën e hetimit, pasi dosja është regjistruar si trafik narkotikësh, dhe jo grup i strukturuar kriminal.
Në fund të shkurtit u sekuestruan 613 kg kokainë dhe për këtë është shpallur në kërkim pronari i firmës në emër të së cilës kishte ardhur ngarkesa, ndërsa pas hekurave janë drejtuesi i kamionit Armando Pezaku dhe menaxheri i firmës, “Arbi Garden”, Donaldo Lusha.
Aktualisht është i shpallur në kërkim ndërkombëtar Arber Çekaj, pronar i kompanisë që kishte porositur kontenierin me banane ku u kap sasia e madhe e drogës. Pavarësisht se kemi të bëjmë me një sasi rekord kokaine, çështja është sfumuar në maksimum, duke kaluar në hetim nga Prokuroria e Durrësit dhe jo nga Krimet e Rënda.
