Bobby Charlton vdiq pasi u rrëzua në shtëpinë e të moshuarve ku jetonte. Ky është përfundimi i hetimit i paraqitur në gjykatë, i cituar tashmë nga BBC.
Legjenda e Manchester United dhe futbollit anglez, i cili ishte 86 vjeç dhe vuante nga demenca, raportohet se humbi ekuilibrin kur u ngrit nga karrigia dhe goditi një dritare dhe “ndoshta radiatorin” e ngrohjes.
Stafi në shtëpinë e të moshuarve nuk vunë re ndonjë lëndim, por më vonë u zbulua një gungë në shpinë. Testet shtesë të kryera në spital zbuluan një brinjë të thyer, që ndikoi në zhvillimin e pneumonisë.
Mjekët më pas vendosën ta vendosnin ish-lojtarin në kujdesin paliativ, por ai ndërroi jetë pesë ditë më vonë.
Mjeku ligjor arriti në përfundimin se vdekja ishte aksidentale, e lidhur me problemin e mushkërive, efektet e rënies dhe vetë demencën.
Bobby Charlton ndërroi jetë më 21 tetor. Legjenda e Manchester United fitoi tre tituj me “Djajtë e Kuq”, dhe gjithashtu një titull evropian, përveç FA Cup. Kulmi i karrierës së tij me “Tre Luanët” ishte fitimi i titullit botëror të vitit 1966.
