Shqipëria është rreshtuar në krah të Britanisë së Madhe, SHBA-ve, Gjermanisë dhe shumë vendeve të tjera perëndimore duke urdhëruar largimin nga vendi të dy diplomatëve rusë.
Ministria për Evropën dhe Punët e Jashtme i komunikoi të hënën ambasadorit rus në Tiranë, shpalljen si persona të padëshirueshëm të dy diplomatëve rusë.
MEPJ tha në një njoftim se kishte thirrur ambasadorin Aleksander Karpushin, “të cilit i’u komunikua nota verbale për shpalljen si persona të padëshirueshëm të dy diplomatëve rusë, veprimtaria e të cilëve nuk përputhet me statusin e tyre diplomatik.”
Vendimi vjen disa javë pas helmimit të ish-agjentit rus, Sergei Skripal dhe vajzës së tij Julia në Mbretërinë e Bashkuar. Britania e Madhe fajëson Rusinë për këtë krim. Baba e bijë u sulmuan me gaz nervor në fillim të Marsit në Salisbëri. Koloneli Skripal u dënua në vitin 2006 me 13 vite burg nga Moska për tradhti kombëtare, i akuzuar si agjent i dyfishtë.
SHBA-të, Gjermania, Franca, Ukraina, Kanadaja dhe vende të tjera europiane kanë urdhëruar dëbimin e dhjetëra diplomatëve rusë.
Presidenti amerikan, Donald Trump ka urdhëruar largimin e 60 diplomatëve rusë nga vendi, si pjesë e një përgjigjeje të koordinuar ndërkombëtare ndaj helmimit të ish-agjentit rus në Britani. Rusia i ka quajtur lëvizjet si “gjeste provokative” dhe është zotuar të hakmerret.
