Socialistët në kohën që drejtoheshin nga Fatos Nano dhe ishin në qeverisjen e vendit kishin një parim, nesër bëj një veprim më të madh që të harrohet i djeshmi. Kjo duket se është e vetmja gjë që PS e Edi Ramës ka ruajtur me fanatizëm nga ajo e Nanos dhe po e zbaton me përpikmëri.
Në krye të Rilindjes, Rama po bombardon opinionin, pothuajse 1 herë në 3 ditë me nga një zhvillim të ri, duke mos lënë absolutisht kohë që të ketë kundërveprim për një çështje të caktuar.
Në këtë fillim të mandatit të dytë të qeverisjes duket se ka një gërshetim mes skandalit politik dhe vendimmarrjeve që prekin direkt qytetarët. Vetëm në muajt e fundit janë disa zhvillime që është e vështirë ti numërosh dhe t’i renditësh.
Konncensione, kanabis, Tahiri, kokaina, lidhjet me rusët, përmbytjet, rritja e taksave, operacione për arrestime zyrtarësh e ish-zyrtarësh, shkarkime gjyqtarësh e prokurorësh, vendosja e taksave të reja, LGBT në shkolla, shumë të tjera.
Të gjitha këto kanë ndodhur në pak muaj, zhvilime që në një vend normal do të shkundnin jo një qeveri, por gjithë sistemin.
Por në Shqipëri nuk kanë prodhuar qoftë edhe një protestë, një reagim. Duket se shoqëria në tërësi është e mpirë, e bombarduar me zhvillime duke mos i dhënë kohën të organizohet, të reagojë, të mbrojë në fund të fundit dinjitetin, nëse i ka mbetur qoftë edhe një grimë.
Nga masat dhe vendimet e qeverisë është prekur direkt xhepi qytetar. Këta të fundit sot i duhet të paguajnë më shumë jo për luksin, por për shërbimet bazë. Janë para që dalin nga një xhep i vogël qytetar dhe hyjnë në xhepin e madh të qeverisë, por që nesër nuk kthehen më tek qytetarët.
Sot, është e vështirë të thuash, që taksat e mbledhura po shkojnë për të pasur arsimim dhe shëndetësi më të mirë, qytete më të pastra dhe të jetueshme, më pak korrupsion në zyrat e shtetit, më shumë siguri, investime, ulje të varfërisë, mbrojtje nga përmbytjet, etj.
Së fundmi zhurma po bëhet për Taksën në rrugën Durrës-Kukës, e njohur si rruga e Kombit. Një taksim i firmosur nga qeveria e parë e Ramës, që u mbajt në sirtar për muaj e muaj dhe sot ka nisur aplikimin.
Por mos u mërzisni, zhurma për taksën e Rrugës së Kombit maksimumi zgjat deri në 1 prill, atëherë kur do të nisë aplikimi për taksimin e banesave. E njëjta proçedurë, e njëjta formulë, e njëjta situatë si me taksën e Rrugës së Kombit.
Të jeni të sigurtë se pak ditë pas 1 prillit do të ndodhë diçka tjetër, që nuk do i japë kohë askujt të reagojë, ndërsa taksidarët do na rrjepin përmes faturave të Ujit apo Energjisë, 5 lekëshin e fundit që na ka mbetur në xhep.
Në fund të fundit do të mësohemi edhe me këtë gjë…
