Nga Boldnews.al
Ditën që policia shqiptare kishte marrë super-masa për të garantuar vizitën e parë të një kryeministri serb, shumë pranë qendrës së Tiranës ndodh një prej atentateve më të rënda të ndodhur në vitet e fundit.
Procesi gjyqësor ndaj personave të përfshirë u kthye ditën e sotme në pikën zero. Gjykata për Krime të Rënda, e cila kishte zhvilluar deri më tani seancat ndaj vëllezërve Markeljan e Klejvi Doçi dhe italianit Salvatore Letizia, shpalli moskompetencën. Në vijim, procesi do të zhvillohet në Gjykatën e Tiranës.
“Boldnews.al” rikthen në mënyrë ekskluzive dinamikën e ngjarjes së ndodhur në 27 maj 2015, ku mbetën të vrarë Mentor Lufi, Besnik Sulku dhe Gert Hoxhaj. Materiali që publikohet është marrë nga dosja hetimore e dorëzuar në gjykatë nga Prokuroria për Krime të Rënda.
Ngjarja është tipike “far west”, i cili përfshin një seri atentatesh të mëparshme, që e kanë zanafillën tek një plagosje e ndodhur në Tiranë, e shoqëruar me një vrasje të ndodhur në Hollandë.
Pasditen e ditës së ngjarjes, Mentor Lufi (Doçi), bashkë me nipat e tij Markeljan dhe Klejvi Doçi, si edhe tre miq të tyre, dalin nga lokali Hilton, pranë Fakultetit të Shkencave të Natyrës.
Ata hipin në dy makina, në një Tuareg ku gjenden Markeljan dhe Klejvi Doçi dhe një një BMË, ku gjenden Mentor Lufi (Doçi) dhe Gerti Hoxhaj. Miqtë e tyre ishin larguar pak më parë me një Range Rover.
Automjetet BMË dhe Tuareg kanë lëvizur njëra pas tjetrës. Përpara ka qenë automjeti tip BMW, i cili drejtohej nga shtetasi Gerti Goxhaj dhe pasagjer shtetasi Mentor Doçi. Në momentin që kanë filluar lëvizjen, pranë makinës BMW janë afruar dy persona të maskuar, të cilët kanë patur pistoleta në dorë.
Sapo janë afruar në një distancë rreth 1 metër nga makina BMW, dy atentatorët kanë qëlluar menjëherë në drejtim të Mentor Doçit.
Nga plumbat e qëlluar nga dy atentatorët, mbetën të vdekur dy personat që gjendeshin në automjet, Mentor Doçi dhe Gert Hoxhaj.
Nipi i Mentorit, Markeljani, i cili drejtonte automjetin e dytë, tip Tuareg, sapo ka parë këtë skenë, i kanë dhënë shpejtësi makinës, duke goditur njërin prej atentatorëve. Më pas, u zbulua se atentatori i goditur me parakolpin e makinës ishte italiani Salvatore Letizia.
Pas përplasjes, Markeljani dhe vëllai i tij, Klejvi, kanë zbritur nga makina me pistoleta në dorë, në ndjekje të atentatorëve. Klejvi Doçi ndjek për disa metra njërin me agresorëve, që rezultoi Besnik Sulku, duke e qëlluar disa herë, derisa objektivi humb jetën.
Menjëherë pas konfliktit, në vendin e ngjarjes mbërrin policia, e cila arreston në vend vëllezërit Markeljan dhe Klejvi Doçi. Disa momente me vonë është bërë edhe arrestimi i shtetasit italian Salvatore Letizia, i cili u kap afër Hotel Dafina, ku edhe i është sekuestruar një qese plasmasi brenda së cilës kisht një xhup si dhe një foto, e cila me pas është vërtetuar se i përkiste viktimës Mentor Lufi (Doçi).
Pas arrestimit, personat e përfshirë në këtë konflikt të përgjakshëm, kanë shpjeguar motivin e ngjarjes. Shtetasit Markelian dhe Klejvi Doçi kanë marrë pjesë dhe kanë kryer në Hollandë, vrasjen e vëllait të Besnik Sulkut, i quajtur Durim Sulku, në shënjë hakmarrjeje për atentatin e kryer ndaj xhaxhait të tyrë viktimës Mentor Lufi (Doçi) në Tiranë me dt.19.12.2014.
Mentor Lufi (Doçi) ka patur një konflikt me Durim Sulkun dhe vëllain e tij, Besnik. Në muajin dhjetor, Mentorit i është bërë një atentat dhe sipas tij ai ishte organizuar nga vëllezërit Sulku. Në muajin mars 2015, Klejvi së bashku me të vëllain Markeljanin, kanë shkuar në Hollandë dhe kanë mësuar se ku rinte Durimi.
Markeljani ka shkuar në Ridderkerk, në qytetin ku rrinte Durimi dhe ka marrë një makinë BMW seria 3 M3. Në makinë, vëllezërit Doçi kishin edhe tre pistoleta. Ata janë veshur me rroba të zeza e me kapele në kokë dhe kanë pritur në parkimin pranë shtëpisë së Durimit.
Rreth orës 23.20, Durim Sulku ka ardhur me një makinë të tipit Smart dhe ka parkuar në vendin që ishte bosh. Klejvi është afruar dhe ka parë që ai ishte vetëm në makinë dhe është kthyer në makinën e tyre BMW.
Më pas, ka shkuar Markeljani, i cili ka qëlluar për vdekje me armë Durim Sulkun. Pas atentatit, ata janë larguar me shpejtësi dhe kanë hedhur makinën dhe armët në det, pranë një dige, me qëllim fshehjen e gjurmëve. Ata nuk u zbuluan nga ana e autoriteteve hollandeze dhe menjëherë u kthyen në Shqipëri.
