Transferimi i Neymar në Paris Saint Germain tronditi botën e futbollit me shifrat e frikshme që klubi parizien derdhi në arkat e Barcelonës.
Dhe në fakt po të shohim merkaton në vitet e fundit, gjërat kanë ndryshuar në mënyrë të frikshme.
Shifra me shuma të pakonceptueshme më parë, privilegje ndoshta të ekzagjeruar (si ato të Neymar te Parisi), e plot shembuj të tjerë, kanë ngritur dyshime të mëdha për vlerat që po transmeton futbolli këto kohë.
Gjithcka duket se është kthyer në komercialitet, me sponsorat që rendin të kapin lojtarët më të mirë për të përfituar edhe ata sa më shumë Rreth kësaj teme ka folur edhe lojtari i kombëtares gjermane, Matthias Ginter i cili në një intervistë dhënë për “Welt am Sonntag”, ka kritikuar komercializimin e futbollit.
“Për momentin, po e ndjej që futbolli po shkon në një drejtim të gabuar, dhe ka ardhur koha që të gjithë duhet të mendojmë se si duhet vepruar, sepse po derdhen gjithnjë e më shumë para, duke sjellë në këtë mënyrë distancimin nga shoqëria, ku vlerat sportive kanë kaluar në plan të dytë” –ka thënë gjermani.
Mbrojtësi i Borussia Mönchengladbach, gjatë intervistës ka kritikuar gjithashtu pagat stratosferike që futbollistët profesionistë përfitojnë:
“Kur mendoj për ata që punojnë në ndërtim ose infermierët që bëjnë një punë shumë më të vështirë se ne duke sakrifikuar shumë, dhe në fund marrin një rrogë me të cilën mezi mbyllin muajin, ne futbollistët duhet të jemi të vetëdijshëm që fati ka qënë bujar me ne. Disa futbollistë nuk e dinë vlerën e parasë, pasi i shoh që shpenzojnë pa kriter ”
Nuk është hera e parë që po flitet rreth kësaj teme, pasi edhe më përpara është ngritur shqetësimi se sporti po shkon drejt komercializimit.
