Detaje të reja zbulohen nga ngjarja e rëndë e një dite më parë në Fier, ku një tentativë grabitje në një banesë, përfundoi me shkëmbim zjarri mes autorëve dhe policisë dhe për pasojë edhe vrasjen e një 20 vjeçari. Mësohet se grupi funksiononte prej kohësh dhe ku në bashkëpunim ata dyshohet të jenë autorë të një sërë grabitjesh të tjera.Policia ka dyshime të forta se një prej tyre është nga Fieri, pasi ka qenë ky i fundit që dyshohet se ka orientuar bandën e grabitësve në banesën e Minella Muçes, pasi kishte mësuar se kishte një sasi të konsiderueshme parash. Nga rindërtimi i ngjarjes është zbuluar se çifti i të moshuarve nuk kanë pasur sende me vlerë apo shuma të madhe parash në banesë. Hetuesit kane ngritur dyshimet se grabitësit bashkëpunonin gjithmonë me banorë të qyteteve ku kryenin vjedhjet. Nga verifikimet e bëra të së kaluarës të dy prej grabitësve, Xhuliano Sollaku që mbeti i vrare pas shkëmbimit të zjarrit me policinë dhe Arben Muça, i cili u plagos, është konstatuar se ata kane pasur prej vitesh aktivitet të dyshimtë.
