Presidenti rus Vladimir Putin tha se një operacion tokësor i Izraelit në Gaza do të ishte problematik.
Sipas tij ky rrezik vinte për shkak të përdorimit të pajisjeve të rënda ushtarake në zonat civile.
“Ne e kuptojmë se çfarë është, por përdorimi i pajisjeve të rënda në zonat e banuara është një detyrë e vështirë. Është e mbushur me pasoja të rënda për të gjitha palët”, tha ai gjatë një samiti të premten.
“Dhe kryerja e këtyre operacioneve pa pajisje është edhe më e vështirë. Gjëja më e rëndësishme është se humbjet mes civilëve do të jenë krejtësisht të papranueshme, rreth 2 milionë njerëz jetojnë atje”, shtoi Putin.
Vërejtjet e Putinit janë në kontrast me veprimet e vetë Rusisë, ndërsa ajo vazhdon një pushtim në shkallë të plotë të Ukrainës.
Rusia ka mohuar në mënyrë të përsëritur se ka shënjestruar civilët ose infrastrukturën civile dhe ka refuzuar të ketë kryer ndonjë krim lufte gjatë asaj që e quan “operacioni i saj special ushtarak” në Ukrainë, pavarësisht provave dërrmuese për të kundërtën.
Putin tha gjithashtu se Moska është e përgatitur të veprojë si ndërmjetëse në konfliktin e vazhdueshëm midis Izraelit dhe Hamasit.
