Ndeshja e javës së kaluar mes Kukësit dhe Vllaznisë u shoqërua me shumë polemika nga kampi shkodran, i cili e akuzoi arbitrin Eldorian Hamiti për gjykim të njëanshëm dhe dashakeqës ndaj tyre.
Për këtë arsye, kuqeblutë e patën shpallur “non grata” arbitrin lezhjan, i cili jo vetëm që nuk i dha një 11-metërsh mëse të pastër Vllaznisë, por edhe e ndëshkoi me shumë kartonë. Një arbitrim i tillë është marrë në shqyrtim nga ana e Sektorit të Gjykimeve pranë FSHF-së, i cili mësohet të ketë dalë në një përfundim: Dënimin pa afat të arbitrit Eldorian Hamiti.
Po ashtu, dy arbitrat e tjerë kryesorë, Emirjon Sino dhe Ardian Beqiri, nuk do të drejtojnë asnjë ndeshje për tri javë, ashtu si anësori Ilir Tartari. Vllaznia ndihet disi e lehtësuar me këtë dënim të Hamitit, megjithatë pikët nuk ia kthen askush dhe ky është dëmi më i madh që i është bërë. Ashtu si edhe ndëshkimet me kartonë, që nuk kthehen pas dhe që skuadra kuqeblu do t’i vuajë.
