Specialisti i futbollit, Sulejman Starova ka dhënë një intervistë për emisionin “Sport News”, ‘Bobi’ ka folur për lëvizjet e fundit në kryeqytet me largimet e trajnerëve Zekic e Shehi nga Partizani e Tirana, por gjithashtu analizon situatën e Kombëtares.
Partizani klubi i parë që shet një trajner, Zoran Zekic tek Osijek- Është një situatë jo serioze në lidhje me marrëdhënien e trajnerit Zekic me Partizanin. Është ai që ka pranuar ofertën dhe nuk ishte serioze të kërkosh largimin. Nuk është lëvizje e mirë, edhe pse Partizani po dëmshpërblehet. Imagjinoni të fillojë punën tashmë ekipi me një trajner tjetër, në këtë fazë të sezonit.
Ndeshja Shqipëri- Republia Çeke- Jemi në një moment të mirë. Vështirësia është si për ne, ashtu edhe për rivalin. Kjo do të thotë se gjendja e kombëtares është e mirë. Na duhen pikë sa më shpejt të jetë e mundur, për të siguruar kalimin në Gjermani. Shpresoj që të kemi sa më shumë fat.
Presioni te Çekia? Që të pretendosh të shkosh në finale të tilla, duhet të përballesh me sfida. Presion kemi ne, por presion ka edhe rivali.Bëhet fjalë për një 90 minutësh vendimtar. Në këto pozita është edhe kundërshtari. Në futboll duhet të ketë frymë grupi, ne kemi çdo post të dubluar.
A e kënaq Shqipërinë barazimi? Ky është një opinion i sportdashësve. Trajneri përgatitet për të gjitha. Ne duhet të kemi shpirtin e garës, topin ka kundërshtari.
Mungon Ismajli. A mund të kemi probleme në prapavijë? Më mirë e di trajneri dhe stafi teknik. Ne kemi përballuar situata të tillë. Ne mos të kthejmë kokën shumë larg, ndaj Polonisë patëm mungesa dhe ia dolëm. Ne kemi dubluar postet, kemi forcë grupi.
Rikthimi i Brojës, titullar të enjten? Këtë vendim e merr trajneri. Është një vlerë e shtuar rikthimi i tij. Nuk ka rëndësi nëse luan nga fillimi apo më pas. Le të shpresojmë te zgjedhjet më të mira.
Cila është 3-shja e sulmit për ty? Kjo 3-she nuk bëhet në letër. Duhet të kesh skuadrën në stërvitje dhe të shikosh sa mund të arrish. Një trajner nga jashtë nuk mund të thojë se kush është 3-shja më e mirë.
A na dërgon kjo sfidë në Gjermani? Fitorja me çekët na dërgon në Gjermani. Besohet shumë te kjo arritje.
Parashikimi i ndeshjes? Nuk i gjej unë këto. Uroj që të marrim një rezultat pozitiv. Kemi dy avantazhe, mirë është të fitojmë, por pranohet edhe barazimi.
