Numri i të vdekurve pas një sulmi me dron gjatë një ceremonie diplomimi në një akademi ushtarake në provincën qendrore siriane të Homsit është rritur në 78, me të paktën 140 të tjerë të plagosur, sipas Observatorit Sirian për të Drejtat e Njeriut.
Observatori me qendër në Britani të Madhe tha se mes të vdekurve ishin nëntë civilë, përfshirë fëmijë.
Ai shtoi se disa nga të plagosurit ishin në gjendje kritike.
Ushtria siriane tha se organizatat e armatosura terroriste të mbështetura nga palët e njohura ndërkombëtare, shënjestruan këtë pasdite, eremoninë e diplomimit të oficerëve të kolegjit ushtarak në Homs duke sulmuar me drone.
Nuk ka asnjë pretendim për sulmin deri më tani, por Observatori Sirian dyshon se sulmi mund të jetë kryer nga milicia islamike Hayat Tahrir al-Sham (HTS) ose grupi terrorist i Shtetit Islamik.
Të dy duan të përmbysin regjimin e presidentit Bashar al-Assad, i cili tani kontrollon dy të tretat e vendit, duke përfshirë provincën e Homsit, pas disa vitesh luftë civile.
Pavarësisht se qeveria siriane nuk ka dhënë ende një numër zyrtar të vdekjeve pas sulmit, ajo shpalli tre ditë zie publike zyrtare duke filluar nga e premtja për ata që vdiqën si rezultat i sulmit brutal terrorist.
