Sergio Ramos ishte i radhës futbollist që ka rënë pre e grabitësve, ku persona ende të paidentifikuar kanë hyrë në banesën e tij dhe kanë marrë sendet me vlerë. Ngjarja u regjistrua më 20 shtator, ndërsa është mbajtur e fshehtë, por kanë qenë mediat spanjolle ato të cilat kanë bërë publike detajet.
Futbollisti ishte i grumbulluar me skuadrën e Sevillas, ndërsa bëhej gati të niste ndeshja e Ligës së Kampionëve me Lens, e mbyllur në shifrat 1-1.
Autorët të cilët ende nuk dihet se sa persona ishin, kanë hyrë ne banesën e lojtarit, e cila ndodhet rreth 20 km larg Sevillas ku kanë marrë sende me vlerë, ora luksore dhe bizhuteri të ndryshme e më pas janë larguar. Në banesë në ato momente gjendeshin 4 fëmijët e çiftit Sergio dhe Pilar, së bashku me dadot e tyre.
Të pyetura në polici, zonajt të cilat shërbenin në shtëpinë e futbollistit kanë pohuar se nuk kanë pasur përplasje fizike me agresorët, ndërsa deklaratat e tyre nuk i kanë ardhur në ndihmë policisë. Kjo nuk është hera e parë që Ramos bie pre e grabitësve, pasi edhe në vitin 2012 në shtëpinë e futbollistit hynë dy persona dhe morën sendet me vlerë.
