Mediat kolumbiane kanë publikuar detaje interesante nga arrestimi i narko-trafikantit shqiptar Besnik Nikolli alias Niko ose i njohur ndryshe me nofkën “El Gordo” në qytetin e Bogota pak kohë më parë.
Sipas një reportazhi të mediave vendase, efektivët e Drejtorisë së Investigimit Kriminal dhe Interpol” kishin mësuar për zhvillimin e një mbledhjeje mes kokave të trafikut të kokainës që mesa duket ishte iniciuar nga shqiptari.
Nikolli kishte vendosur t’u jepte fund përplasjeve me grupet e tjera dhe kishte thirrur në një takim trafikantë nga Spanja, Holanda, Meksika, Shqipëria dhe Kolumbia.
Takimi zgjati tre ditë dhe agjentët e policisë i vunë nofkën “Samiti i drogës”. Në filmime shihet se në këtë kanë marrë pjesë edhe krerët e një bande tjetër të fuqishme shqiptare, Lirido Shkurtaj alias Lirido Ajazi alias “Mario”. Edhe ai u vu në pranga.
Pas arritjes së marrëveshjes për dërgimin e 1 ton kokainë në Francë ata vendosën të festojnë. Shkuan në një nga lokalet e natës në Santa Marta dhe Besnik Nikolli urdhëroi mbylljen e tij për klientët e tjerë duke e vënë në shërbim vetëm të bosëve të drogës. Ky ishte edhe gabimi pasi tërhoqi shumë vëmendje tek autoritetet që deri në atë moment nuk e dinin ku po zhvillohej “Samiti i drogës”.
Në samit thuhet se është diskutuar për eliminimin e shitësve të tjerë e për të marrë më pas më shumë pushtet në blerjen e drokës në Kolumbi e shpërndarjen më tej në Francë, Shqipëri Holandë dhe në Gjermani.
Përmes agjentëve të infiltruar është bërë e mundur identifikimi i personave, ndërsa janë gjurmuar për vendndodhjen e tyre pas takimit. Po ashtu, bisedimet në samit mes gjashtë të konsideruarve koka të organizatave kriminale zgjatën për tre ditë.
El Gordo është filmuar përmes dronit teksa ka festuar suksesin në një lokal në Santa Marta pas takimit e më tej edhe në ballkonin e banesës pak para se të arrestohej.
Një tjetër shqiptar, Mario Ajazi, fillimisht i ka shpëtuar prangave por u zbulua nga postimet që bënte e dashura e tij në rrjetin social “TikTok” pasi ishte shpërngulur në një tjetër zonën. I njohur edhe me emrin Lirio Ajazi dyshohet se ishte përgjegjës për koordinimin e lëvizjes së drogës nga Kolumbia përmes kontejnerëve në Valle del Cauca dhe Nariño.
Ndërkaq, bëhet e ditur se u ndaluan dhe katër shtetas të tjerë që do të bashkëpunonin me shqiptarët.
Pas daljes nga lokali, narkotrafikantët u mbajtën nën vëzhgim dhe 6 prej tyre u arrestuan. Pamjet janë bërë nga një person i infiltruar i Drejtorisë së Investigimit Kriminal dhe Interpol. Sipas hetuesve, trafikantët e lartpërmendur të drogës “përdorin identitete të rreme”.
