Nënkryetari i Partisë Aleanca Maqedonase për Integrim, Eftim Mitrevski, në një prononcim për mediat ka dënuar ardhjen e ambasadorit bullgar në Pustec, duke e cilësuar si presion të hapur dhe ndërhyrje në procesin e Censit.
Mitrevski shtoi më tej se nuk është normale që të ndërhyhet në këtë formë në punët e brendshme. Sipas tij, “në asnjë dokument të shtetit shqiptar nuk figurojnë bullgarë dhe vizita e ambasadorit është krejtësisht e gabuar.”
“Është krejtësisht jo normale, është ndërhyrje ne punët e brendshme te këtij shteti, si vizita e ambasadorit bullgar, ashtu edhe vizita e zv.presidentes se Bullgarisë që erdhi para 4-5 ditësh. Ajo duhej përzënë nga Shqipëria, duhet t’i jepej ultimatum, që ta linte shtetin shqiptar dhe të dilte jashtë kufirit. Si e lejon shteti shqiptar që personalitete te tilla, tani në kohën e Censusit te vijnë te ushtrojnë propagande. Ne jemi qytetare shqiptare, ne po mbushim mot 100 vjet qe ky shtet shqiptar na ka njohur me institucione. Ne asnjë dokument te shtetit shqiptar nuk figurojnë bullgare dhe vizita e ambasadorit bullgar është krejtësisht e gabuar.
Ky është presion. Ardhja e zv.presidentes bullgare vizita e ambasadorit edhe te disa emisarëve qe vijnë ne bashkinë tone, është presion qe iu behet qytetarëve shqiptare me identitet maqedonas. Po është e vërtete qe ëshët ngritur ne Pustec flamuri bullgar. Kjo ka ndodhur ne gusht, ne festen e pagëzimit. Bullgarët kane shpërdorë libra, kalendarë ne mes të vitit, një Zot e merr vesh.
Por ne si qytetare të shtetit shqiptar, me identitet maqedonas kërkojmë mbrojtje nga shteti shqiptar. Shteti shqiptar duhet ti dale Zot dhe te thotë qe këta janë taksapagues, qe këta i kemi njohur institucionalit si maqedonas dhe janë qytetare te këtij shteti. Ky shtet ka organizuar me se miri një Census, për te gjithë qytetaret ne Shqipëri për te ditur efektin e reformave qe zhvillohen ne territorin e Shqipërisë dhe eshët keq te keqpërdoren komunitetet dhe bashkësitë etnike ne ketë shtet”, tha Mitrevski.
Ndërkohë, ambasadori bullgar Ivaylo Kirov jashtë kamerave është shprehur se donacionet e sjella në spitalin e Pustecit janë një projekt i nisur para Censit, i njëjti projekt që ka sjellë dhe mjek me herët.
Sa i takon pritshmërive për rezultatin e Cens ai ka shtuar se Bullgaria nuk lufton për numra e kushdo është i mirëpritur për të shprehur etninë e vet e se nuk është qëllimi për të luftuar me vëllezërit e Maqedonisë së Veriut.
Ambasadori bullgar ka vazhduar me tej duke thënë se nuk ndien shqetësim për procesin e Censit por duhet të ndryshojë mënyra sesi njerëzit e shohin Bullgarinë.
“Nuk duam të luftojmë me vëllezërit të Maqedonisë së Veriut”, mësohet të ketë thënë ai.
Ivaylo Kirov ishte këtë të mërkurë në Pustec në qëndrën shëndetësore ku u bë donacion nga Bullgaria për të dy qendrat e bashkisë së Pustecit.
