Katër persona kanë rënë në prangat e policisë së Fierit dhe dy të tjerë janë proceduar penalisht të akuzuar për vepra të ndryshme penale.
Sipas policisë mësohet se të arrestuar janë shoferë të dehur të cilët kanë qenë burim aksidentesh dhe gjithashtu persona që akuzohen për shitje të lëndëve narkotike.
“Specialistët për Hetimin e Narkotikëve të DVP Fier arrestuan në flagrancë 21 vjeçarin, banues në Lushnjë, pasi u kap duke drejtuar automjetin, në gjendje të dehur. Gjithashtu, u referuan materialet në Prokurori ku nisi procedimi në gjendje të lirë për pasagjerin në automjetin që drejtonte 21-vjeçari, një 28 vjeçar, pasi gjatë kontrollit fizik, iu gjet një sasi e vogël lënde e dyshuar narkotike kokainë.
Po këta specialistë referuan materialet në Prokurori ku nisi procedimi në gjendje të lirë për sht22 vjeçarin, banues në Fier, pasi gjatë kontrollit fizik, iu gjet një sasi e vogël lënde e dyshuar narkotike cannabis sativa, ndërsa gjatë kontrollit në banesën e këtij shtetasi, u gjet një sasi fishekësh arme gjahu që posedoheshin pa leje.
Në vijim të veprimeve procedurale të kryera për aksidentin e ndodhur ditën e djeshme, në aksin rrugor “Lushnjë-Fier”, me pasojë vdekjen e një pacienti që po transportohej me autoambulancë, specialistët e Sektorit të Qarkullimit Rrugor të DVP Fier arrestuan 2 drejtuesit e automjeteve (kamion dhe autoambulancë) të përfshirë në këtë aksident, 31 vjeçarin dhe një 54 vjeçar për veprën penale “Shkelja e rregullave të qarkullimit rrugor”.
Po këta specialistë arrestuan në flagrancë shtetasin një 37 vjeçar, banues në Berat, pasi u kap duke drejtuar automjetin, në gjendje të dehur.”- njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
