Teksa sulmet ruse ndaj infrastrukturës së porteve në Ukrainë vijojnë, kjo e fundit ka shfrytëzuar një rrugë të re për të siguruar transportin e mallrave.
Autoritetet njoftuan se dy anije mbërritën në portin e Ukrainës të shtunën, nëpërmjet një rruge të re përmes detit të zi.
Anijet do të ngarkonjnë 20 mijë ton grurë që do të eksportohet për tregjet botërore.
Sipas zyrtarëve, kjo është hera e parë që anijet civile kanë arritur në një port ukrainas, që nga prishja e marrëveshjes me Rusinë që garantonte sigurinë e transportit detar.
Më parë korridori ishte përdorur vetëm nga anijet që niseshin nga Ukraina.
Që nga prishja e marrëveshjes, Rusia ka kërcënuar se do t’i trajtojë anijet civile që lundrojnë drejt Ukrainës si objektiva të mundshëm ushtarakë.
Më e fundit ndodhi mëngjesin e kësaj të diele kur dronet ruse sulmuan rajonin e Odesës, me shenjestër një ndërtesë të agrikulturës.
Megjithatë forcat ukrainase deklaruan se kanë shkatërruar 6 dronë dhe 6 raketa para se ato të arrinin objektivin.
Presidenti Volodymyr Zelensky, falënderoi aleatët për mbështetjen e vazhdueshme për luftën e Ukrainës kundër pushtimit rus ndërsa pritet që javën tjetër të qëndrojë në Shtetet e Bashkuara, ku do të takohet me presidentin amerikan, Joe Biden, dhe ligjvënës të lartë të Kongresit nga të dyja partitë.
Ai po ashtu pritet t’i adresohet Asamblesë së Përgjithshme të Kombeve të Bashkuara që mblidhet javën e ardhshme.
